બા....... એક વાર પાછી આવ ને ! ~ડૉ. નિમિત ઓઝા

*'બા એકવાર પાછી આવને..'*

સાંતા ક્લોઝ તો....
મોટી ક્લબમાં આવે, પાર્ટીઓમાં આવે,
હોટેલમાં આવે.
બા, તું જ એકાદ રોટલી ચૂલા ઊપર ચડાવ ને !
બા, એકવાર પાછી આવ ને !

બા, સફેદ મોજામાં તારા જેવો સ્પર્શ
નથી વરતાતો,
રસોડામાં રોજ સવારે ધીમું ધીમું,. એ પણ કેમ નથી ગાતો ?
બા, એને તો ગુજરાતી પણ નથી આવડતું,
શું કરવી મારે એની સાથે વાતો ?

બા, સાંતા ક્લોઝ તો ફક્ત ગીફ્ટ આપે છે.
જો શક્ય હોય તો થોડા આશીર્વાદ પણ એની સાથે મોકલાવ ને !
બા, એક વાર પાછી આવ ને !

બા, સફેદ દાઢીમાં
તારા જેવું સ્મિત કેમ નથી દેખાતું ?
એના ખોળામાં માથું મુકવાનું મન નથી થાતું,
બા, આ બાજુ
તલ શીંગની ચીકી ને મમરાના લાડુ,
ને પેલી બાજુ
ચોકલેટની રેલમ છેલ.

બા, આ બાજુ
તારા અવાજમાં હજુ પણ ગુંજતા હાલરડા,
ને પેલી બાજુ જિંગલ બેલ.
બા, જિંગલ બેલની ટયુનમાં એકાદ હાલરડું મોકલાવ ને !
બા, એક વાર પાછી આવ ને !

બા,
સાંતા તારા જેટલો ક્લોઝ તો ન જ આવી શકે.
એના થેલામાં એક વાર તારી જાતને મોકલાવ ને !
બા.......
એક વાર પાછી આવ ને !

~ડૉ. નિમિત ઓઝા